الحقيقه انا و ليه كنا عاملين عقد احتكار لمدة آخر العمر..لما خطوبتى اتفركشت حبييت اعرف ليه ؟؟ بس الحقيقه ماكنش فيه اجابه..من وجهة نظرى المتواضعه (أكيد يعنى ) انا شايفه انى عملت كل اللى عليا فالموضوع ده وكمان بزياده..عشان كده كان لازم افضل أسأل ليه و أعرف ليه هوه فركش..هوه عبيط ؟؟ ازاى يعمل كده ده مش هيلاقى حد لقطه زيي..لكن الحقيقه ان ليه هيه اللى كسبت وفازت بالعقد الممتد المفعول وبرضه أنا معرفتش ليه ؟؟
طيب بلاش اعرف ليه..هوه مافيش كاتالوج يوضح الثوابت ؟؟؟ اقصد يعنى كتاب كده يقولك يابنى ياحبيبى..طالما انت عملت كذا و كذا فالعلاقه يبقى انت مش غلطان وعداك العيب وراح للجنبك و يبقى هوه اللى عبيط وحمار ومتسألش ليه..لكن مع الأسف مفيش..
(ليه) دى مهمه قوى..قولتلى برضه ليه !! شفت ليه ازاى مهمه ؟؟ مهمه مش عشان تطلع نفسك ملاك برئ ومش غلطان وتبرأ نفسك من أى ذنب..لأ مش دى المشكله..المشكله ان روحك اللى بتسأل قبل عقلك والسؤال بيطلع من قلبك وروحك وكيانك كله عشان نفسك بتدور على اجابة سؤال أهم انت بتبقى عايز تعرف انت صح ولا تقلب على نفسك وتغير رأيك فيك وتبتدى تبصلها بصه وحشه وتفقد بقى ثقتك بنفسك وتطلع انت الشرير والندل فالحوار كله وتبدأ كل حاجه تتقلب عكسها وتفكر انه ياااااااه كتر خيره والله انه استحملنى كل ده ويارب الاقى حد يقبل بيا..لكن عشان هوه مش كده ابدا وعشان عمر ما (ليه؟) كانت بنت ناس طيبيين وولاد حلال زيك كده و عمر (ليه؟) ما كان ليه اجابه تشفيك وترضى اللى اتكسر جواك..وعشان مفيش كتالوج يقولك ايه المفروض و ايه الصح و الغلط...أن قررت أتجاهل ليه,وعرفت بعد سنين ان : هوه كده..لازم تفهم كده,مش عافيه لكن فيه حاجات كده..لازم تقبلها كده..
ولأنك انسان واعى و مثقف ومن فصيلة البنى آدمين و ابن ناس كويسين لازم تبقى عارف انك اكتر واحد عارف عيوبك ومميزاتك,وانك انت الوحيد الحكم على كل الأحداث اللى حصلت فى حياتك وبرضه انت الوحيد اللى من جواك عارف انك هتبقى اكتر واحد حيادى ف حكمك على الأحداث اللهم اذا كنت لاحول ولاقوة الابالله اعوذ بالله يعنى يعنى مصاب بجنون العظمه ودى حاجه مش تبعنا..
لذلك.. قررت ان أنا كنت كويسه..وانت كنت كويس..لكن احنا الأثنين مش كويسين مع بعض..ومش كل الحجات الجميله والحلوه بتنفع مع بعضها,ينفع تاكل مربى مع عسل ؟؟ واحد فالأثنين هيبقى طعمه ماسخ مع التانى..
من غير اى اسباب قدر الله وماشاء فعل وخلاص كل حاجه انتهت كان وقتها لحد كده..أما بالنسبه للاخت (ليه؟ ) انا بقالى فتره متخانقه معاها ولو سمحتم محدش يسألنى ليه..
أزال المؤلف هذا التعليق.
ردحذف